ស្ត្រីដែលត្រូវបានមើលរំលង

When women left out, Pineeh Pinooh #2

សោភ័ណ និងកូន។ រូបថត៖ អុកស្វាម

"នៅ​ពេលដែល​គ្មាន​​ចំណូល​ សោភ័ណ មិនមានលទ្ធភាព​ក្នុងការចំណាយ​ទៅលើ​ថ្លៃម្ហូប ថ្លៃផ្ទះ និង​ថ្លៃពេទ្យនោះទេ។ ដូច្នេះ សោភ័ណ ក៏សម្រេចចិត្ត​វិល​ទៅនៅ​ផ្ទះជាមួយ​ម្តាយ ពឹងផ្អែក​លើ​ម្តាយ​ឱ្យ​ជួយ ម្តាយ​សោភ័ណ​ក៏​ជា​អ្នក​ធ្វើការ​តាម​ផ្ទះដែរ"

សោភ័ណ ជា​អ្នកធ្វើការ​តាមផ្ទះ និង​ជា​ម្តាយ​មានកូនបីនាក់។ កាល​ពីពេលថ្មីៗនេះ នាង​ទើបសម្រាល​បានកូនទីបី​ប្រកប​ដោយ​សុខភាពល្អ ​ប៉ុន្តែជីវភាព​ដ៏សែន​លំបាក​របស់​នាងបាន​ធ្វើ​ឱ្យ​នាង​ស្ថិត​ក្នុង​ស្ថាន​ភាព​កាន់​តែ​ងាយ​រងគ្រោះ​ថែម​ទៀត នៅ​ពេល​មួយ​ដែល​នាង​សម​តែ​ទទួល​បាន​សេច​ក្តីរីក​រាយ​។

នាង​ជាអ្នក​រក​ចំណូលសំខាន់​ជាង​គេ​សម្រាប់​គ្រួសារ។ ប្តី​របស់​នាង​ជា​អ្នក​លាងម៉ូតូលក្ខណៈគ្រួសារតូចមួយ ហើយគាត់​អាច​ផ្តល់​ឱ្យ​នាង​បាន​តែ​ ៥០ដុល្លារ ទេក្នុងមួយខែ។ ការ​ងារ​តាម​ផ្ទះ ​គឺ​ជា​កិច្ច​ការ​ហត់​នឿយ​ណាស់​សម្រាប់រាង​កាយ។ នៅពេល​ដែល​នាង​ជិតគ្រប់ខែ សោភ័ណ ​រងនូវ​ការ​ចុកចាប់​ខ្លាំងទ្រាំ​មិន​បាន ដែល​អាច​បណ្តាល​ឱ្យ​កូន​ក្នុង​ផ្ទៃពោះ​មាន​គ្រោះថ្នាក់។ ដោយ​ស្តាប់​តាម​ឱវាទរបស់​ម្តាយ នាងក៏ឈប់​ធ្វើការ​នៅពេល​ដែល​គភ៌​បាន​៨ខែ។ ប៉ុន្តែ នៅ​ពេលដែល​គ្មាន​​ចំណូល​ នាង​មិនមានលទ្ធភាព​ក្នុងការចំណាយ​ទៅលើ​ថ្លៃម្ហូប ថ្លៃផ្ទះ និង​ថ្លៃពេទ្យនោះទេ។ ដូច្នេះ សោភ័ណ ក៏សម្រេចចិត្ត​វិល​ទៅនៅ​ផ្ទះជាមួយ​ម្តាយ ពឹងផ្អែក​លើ​ម្តាយ​ឱ្យ​ជួយ ម្តាយ​សោភ័ណ​ក៏​ជា​អ្នក​ធ្វើការ​តាម​ផ្ទះដែរ។

ក្រោយ​ពេល​ដែល​បាន​ដឹង​ថា​សោភ័ណមិន​អាច​ធ្វើ​ការ​បាន ហើយ​គ្មាន​ប្រាក់សន្សំទេ ម្តាយរបស់​នាង​ក៏ទៅខ្ចី​ប្រាក់​ពី​មេ​របស់​គាត់ សម្រាប់​យក​មក​ចំណាយ​លើ​ថ្លៃ​សម្រាល​កូន​របស់​សោភ័ណ​ នៅ​មន្ទីរ​ពេទ្យ​មួយ​ក្នុង​ទីក្រុង​ភ្នំពេញ។ ជា​អកុសល នៅ​ជិត​ថ្ងៃ​សម្រាលកូនមកដល់ ស្រាប់​តែ​ម្តាយ​របស់​សោភ័ណ​រង​របួស​នៅកន្លែងធ្វើការ ហើយ​មិន​អាច​ធ្វើការតទៅទៀត​បាន​អស់​ជាច្រើនខែ ព្រោះត្រូវ​សម្រាកព្យាបាល​របួស។ ក្រោយ​ពីនាងសម្រាលកូនរួច សោភ័ណ ត្រូវ​មើលថែទាំម្តាយ​ដែលមានរបួសផង និងកូនខ្ចីរបស់​ខ្លួនផង និងដល់ពេលត្រូវ​សង​ប្រាក់​ខ្ចីគេទេ។ ជាមួយ​នឹង​សេចក្តីត្រូវការ​ច្រើនបែបនេះ សោភ័ណ ត្រូវ​បង្ខំ​ចិត្ត​ត្រឡប់​ទៅធ្វើ​ការវិញមុន​កាលកំណត់​ ដោយ​ទាំង​មិន​ដឹង​ថា​តើ​ត្រូវ​ថែទាំកូន ​និង​ម្តាយ​ដោយ​របៀប​ណា ឬ​ក៏​ថា​នឹង​មាន​អ្នក​ណា​ជួយឡើយ។ នៅពេល​ដែល​នាងមិន​បាន​ទៅធ្វើ​ការកាន់​តែយូរ គ្រួសារ​របស់​នាងទាំងមូល​ធ្លាក់​ខ្លួនកាន់​តែក្រ។

រឿងរ៉ាវដូចជារឿងរបស់ សោភ័ណ កើតមាន​នៅ​កម្ពុជា​ ជា​រៀងរាល់ថ្ងៃ

យោងតាម​របាយការណ៍​របស់អង្គការ​អន្តរជាតិ​ខាងការងារ ILO នារីពលករ​ក្រៅប្រព័ន្ធ ៧៧% យល់ថា​ខ្លួនប្រឈម​ភាពរងគ្រោះ​ខ្ពស់​ណាស់​នៅពេល​ណា​ដែលពួកគេត្រូវ​នៅថែ​ទាំទារក​ទើបនឹងកើត និង​ត្រូវ​សម្រាក​ក្នុង​ពេលបែបនេះក្នុង​ជីវិត​របស់​គេ។

​រឿងរ៉ាវ​ទាំង​នេះ​គូសរំលេច​ឱ្យ​ឃើញ​នូវ​គម្លាត​កាន់​តែធំឡើងរវាង​អ្នក​មាន និង​អ្នក​ក្រ​នៅកម្ពុជា ហើយ​ជាអកុសល គម្លាតនេះ​កំពុង​តែ​បំផ្លាញដល់​កិច្ច​ខិតខំ​នានា​កន្លងមក​ក្នុង​ការ​ប្រយុទ្ធ​ប្រឆាំង​នឹងភាព​ក្រីក្រ​នៅ​ក្នុង​ប្រទេសនេះ។ កម្ពុជា​មិន​មែន​ជាករណី​ដាច់​ដោយ​ឡែក​នោះ​ទេ។ នៅ​ទូទាំង​ពិភពលោក​ វិសមភាព​បាននឹងកំពុង​តែ​កើន​ខ្ពស់​ឡើង ជា​ពិសេស​នៅ​ក្នុង​បណ្តា​ប្រទេស​កំពុង​អភវិឌ្ឍ។

​រាជរដ្ឋាភិបាលកម្ពុជា​បាន​ចាត់​វិធានការ​សំខាន់ៗជាច្រើន ​ឆ្ពោះទៅ​ផ្តល់​ការ​ថែទាំសុខភាព​ដល់ពលរដ្ឋច្រើន​ថែម​ទៀត តាម​រយៈ​ការដាក់​ឱ្យ​ប្រើកាតថែទាំសុខភាព (HEC) និង​បេឡាជាតិ​របបសន្តិ​សុខសង្គម (NSSF)។ ប្រព័ន្ធ​ទាំង​ពីរ​នេះ​ជាជំហាន​ដ៏សំខាន់​ឆ្ពោះទៅ​ពង្រីក​ការ​គ្របដណ្តប់​សេវា​ថែទាំសុខភាព ប៉ុន្តែ​មាន​ចំណុចច្រើន​ទៀត​ដែល​ត្រូវ​ធ្វើ​ឲ្យ​កាន់​តែប្រសើរ។ ការវិនិយោគ​ច្រើន​ទៀតលើ​ផ្នែកនេះ ​គឺ​ជា​ភាពចាំបាច់ដើម្បី​ពង្រីក​វិសាលភាព​គ្របដណ្តប់​របស់​សេវា និង​ធ្វើ​ឱ្យ​គុណភាព​របស់​សេវា​កាន់​តែ​មាន​ភាពប្រសើរ​ឡើង។