រដ្ឋមន្រ្តីក្រសួងកសិកម្ម ចុះពិនិត្យមើលគម្រោងប្លុករ៉ាយស៍
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្ដម វេង សាខុន បានចុះទៅសួរសុខទុក្ខកសិករដែលកំពុងអនុវត្តគម្រោងប្លុករាយស៍ (BlocRice) នៅស្រុករវៀង ខេត្តព្រះវិហារ កាលពីចុងខែឧសភា ដើម្បីស្វែងយល់អំពីដំណើរការគម្រោងថ្មីក្នុងការលើកកម្ពស់ជីវភាពរស់នៅរបស់កសិករឲ្យកាន់តែប្រសើរឡើង។
ប្លុករ៉ាយស៍ គឺជាគម្រោងថ្មីមួយដែលត្រូវបានបង្កើតឡើងដោយ អង្គការអុកស្វាម និងចាប់អនុវត្តក្នុងខែវិច្ឆិកា ឆ្នាំ២០១៨ ។ គម្រោងនេះ ប្រើប្រាស់បច្ចេកវិទ្យាប្លុកឆេន (Blockchain) ដើម្បីតភ្ជាប់បណ្តាញមនុស្សនៅក្នុងខ្សែសង្វាក់ផ្គត់ផ្គង់ស្រូវសរីរាង្គ ដើម្បីធានាថា កសិករ ទទួលបានការបង់ប្រាក់ ត្រឹមត្រូវ និងល្អប្រសើរជាងមុន។ គំនិតនេះ ចាប់ផ្តើមពីកិច្ចសន្យាកសិកម្ម។ អ្នកនាំចេញ បានប្តេជ្ញាចិត្ដថា នឹងទិញស្រូវ-អង្ករពីកសិករក្នុងតម្លៃទីផ្សារ ដោយបូកបន្ថែមប្រាក់បុព្វលាភ ដែលធានាទីផ្សារសម្រាប់ស្រូវ និងកាត់បន្ថយភាពមិនច្បាស់លាស់មួយចំនួន សម្រាប់កសិករ។ ប្លុករ៉ាស៍ បង្កើតមូលដ្ឋានទិន្នន័យដែលអាចចូលដំណើរការបានសម្រាប់អ្នកចូលរួមទាំងអស់នៅក្នុងគម្រោង ដែលជាប្រភេទនៃប្រព័ន្ធឌីជីថល ទំនាក់ទំនងតាម "កិច្ចសន្យាវៃឆ្លាត" ដែលជួយឱ្យកសិករអាចចរចាតម្លៃបានល្អប្រសើរជាងមុន។
កិច្ចសន្យាវៃឆ្លាត សម្រាប់កសិករ ដើម្បីទទួលបានចំណូលប្រកបដោយភាពត្រឹមត្រូវ
ក្នុងអំឡុងពេលសាកល្បងនេះ អង្គការអុកស្វាម បានសហការក្នុងភាពជាដៃគូ ជាមួយក្រុមហ៊ុនអេមរុ រ៉ាយស៍ (Amru Rice) ដែល កំពុងធ្វើការជាមួយសហគមន៍កសិកម្មរស្មីលើកកម្ពស់កសិករ ដែលមានកសិករចូលរួមសាកល្បងសរុបចំនួន ៥០ នាក់។ កសិករចូលរួមគម្រោងសាកល្បង ប្លុករាយស៍ នេះ បានយល់ព្រមផ្តល់កិច្ចសន្យាលក់ស្រូវចំនួន ១00 តោន។ នៅចុងក្រោយ ពួកគាត់បានផ្គត់ផ្គង់ស្រូវ ៩២,៥ តោន ក្នុងតម្លៃ ២២ ៣២៣ ដុល្លារ ដែលត្រូវបានដឹកតាមទូកុងតឺន័រពីរ ទៅប្រទេសហូឡង់ នៅចុងខែមីនា ឆ្នាំ២០១៩។
ប្លុករ៉ាយស៍ ផ្ដល់នូវតម្លៃដែលអាចព្យាករបានច្រើនជាងមុន ។លោកស្រី ជុំ លីវឿង ប្រធានសហគមន៍កសិកម្ម បាននិយាយថា "មានអត្ថប្រយោជន៍ច្រើនជាងការលក់ទៅឱ្យឈ្មួញ ដោយសារតែតម្លៃរបស់ពួកគេប្រែប្រួល" ។ "ដោយមានកិច្ចសន្យាប្លុករ៉ាយស៍" លោកស្រី បាននិយាយថា "តម្លៃ គឺមានស្ថេរភាព" ។
កសិករ ដែលចូលរួមក្នុងគម្រោងប្លុករ៉ាយស៍ ត្រូវបានគេទិញស្រូវក្នុងតម្លៃប្រហែល ០,២៥ ដុល្លារ ក្នុងមួយគីឡូក្រាម និងបន្ថែមប្រាក់បុព្វលាភបន្ថែមចំនួនរវាង ០,០៣ ដល់ ០,០៥៥ ដុល្លារ។ តម្លៃខ្ពស់នេះ បានធ្វើអោយកសិករទទួលចំណូលបន្ថែមឡើងដល់ជិត ១០០ ដុល្លារ សម្រាប់កសិករភាគច្រើនដែលបានផលិតស្រូវជាមធ្យមតិចជាង ២ តោន។
ឯកឧត្តមរដ្ឋមន្ត្រី ដែលបានចុះមកពិនិត្យគម្រោងនេះ មានប្រសាសន៍ថា "ប្លុករ៉ាយស៍ គឺជាគំនិតផ្តួចផ្តើមដ៏ល្អមួយ នៅក្នុងសម័យឌីជីថលកម្រិតខ្ពស់ ដើម្បីទំនាក់ទំនងប្រភព និងព័ត៌មានសំខាន់ៗពីកសិករ ទៅដល់អតិថិជនចុងក្រោយ" ។ លោកបានបន្ថែមថា "ប្រទេសកម្ពុជា ត្រូវតែកែលម្អខ្សែសង្វាក់ផ្គត់ផ្គង់កសិកម្មទាំងមូលរបស់ខ្លួន ដើម្បីបំពេញតាមស្តង់ដារទីផ្សារអន្តរជាតិសម្រាប់អត្ថប្រយោជន៍ប្រកួតប្រជែង" ។
ឯកឧត្ដមរដ្ឋមន្ត្រី ក៏បានទទួលស្គាល់ផងដែរពីការចូលរួមចំណែកដ៏យូរអង្វែងរបស់អង្គការអុកស្វាម ក្នុងការលើកកម្ពស់វិស័យកសិកម្មនៅក្នុងប្រទេសកម្ពុជា ដោយអង្គការអុកស្វាម បានគាំទ្រដល់ការអភិវឌ្ឍរបស់ប្រទេសកម្ពុជាតាំងពីឆ្នាំ១៩៧៩ មក ។
“ប្លុករ៉ាយស៍ គឺជាគំនិតផ្តួចផ្តើមដ៏ល្អមួយ នៅក្នុងសម័យឌីជីថលកម្រិតខ្ពស់ ដើម្បីទំនាក់ទំនងប្រភព និងព័ត៌មានសំខាន់ៗពីកសិករ ទៅដល់អតិថិជនចុងក្រោយ ។ លោកបានបន្ថែមថា ប្រទេសកម្ពុជា ត្រូវតែកែលម្អខ្សែសង្វាក់ផ្គត់ផ្គង់កសិកម្មទាំងមូលរបស់ខ្លួន...”