កម្ពុជានឹងបូមប្រេងលើកដំបូងនៅដំណាច់ឆ្នាំនេះ។ ការជីករ៉ែ ប្រេងកាត និងឧស្ម័នអាចនាំមកនូវឱកាសសេដ្ឋកិច្ច ដ៏ប្រសើរ ដល់ប្រទេស ប៉ុន្តែធនធាននេះនឹងត្រូវតែរៀបចំឲ្យមានអភិបាលកិច្ចប្រកបដោយបរិយាប័ន្ន។
កាលពីខែមេសា អង្គការអុកស្វាម សហការជាមួយ អង្គការសង្គមស៊ីវិលចំនួន ១៣ បានរៀបចំវេទិកាអភិបាលកិច្ចវិស័យឧស្សាហកម្មនិស្សារណកម្ម នៅកម្ពុជា លើកទី៧ ក្រោមប្រធានបទ “ទស្សនៈវិស័យរ៉ែ ប្រេង និងឧស្ម័ន ឆ្នាំ២០១៩ និងនាពេលអនាគត”។ វេទិកាអភិបាលកិច្ចវិស័យឧស្សាហកម្មនិស្សារណកម្ម នៅកម្ពុជា ដែលហៅកាត់ថា EIGF ត្រូវបានដឹកនាំដោយ ក្រសួងរ៉ែ និងថាមពល ដោយមានសមាជិកពីក្រុមហ៊ុនរ៉ែ ប្រេង និងសមាជិកសង្គមស៊ីវិលចំនួន១៤។
អ្នកចូលរួមមានសមាសភាពមកពី ថ្នាក់ដឹកនាំក្រសួងរ៉ែ និងថាមពល ក្រុមហ៊ុនរ៉ែ និងប្រេង ក្រុមប្រឹក្សាឃុំ និងសមាជិកសហគមន៍មូលដ្ឋានពីខេត្ត រតនៈគីរី មណ្ឌលគីរី ព្រះវិហារ និងខេត្តព្រះសីហនុ វិទ្យាស្ថាន សិក្សាស្រាវជ្រាវ យុវជន និងសង្គមស៊ីវិលផងដែរ។ វេទិកានេះបានផ្តល់ឱកាសសម្រាប់អ្នកចូលរួមចែករំលែកបទពិសោធន៍ និងជជែកពិភាក្សា លើករបៀបវារៈ ជាច្រើន ជាពិសេសផ្តោតទៅលើកិច្ចពិភាក្សារួមធំៗពីរគឺ ការយល់ឃើញរបស់សហគមន៍មូលដ្ឋានលើវិស័យរ៉ែ និងទស្សនៈវិស័យរ៉ែ ឆ្នាំ ២០១៩។
ឯកឧត្តម ម៉េង សក្តធារ៉ា រដ្ឋលេខាធិកាក្រសួងរ៉ែ និងថាមពល មានប្រសាសន៍ថា “ជាការពិតណាស់ដែលថា វិស័យរ៉ែ ប្រេង និងឧស្ម័ន នឹងនាំមកនូវឱកាសសេដ្ឋកិច្ចមួយដ៏អស្ចារ្យ។ ប៉ុន្តែ ដើម្បីអាចទាញយក និងប្រែក្លាយផលប្រយោជន៍ទំាងនេះបាន គ្រប់គម្រោងរ៉ែចាំបាច់ត្រូវធានាឲ្យបានថាប្រទេសជាតិនេះនឹងសម្រេចបានកត្តាដូចជា៖ ១) ប្រសិទ្ធភាពការគៀងគរនៃទំហំ និងសក្តានុពលនៃចំណូលជាតិ ២) ការរីកចម្រើនលើជីវភាពរបស់សហគមន៍មូលដ្ឋាន ដែលនៅក្បែរទីតាំងអាជីវកម្មរ៉ែ ៣)និរន្តភាពទៅលើធនធានធម្មជាតិ និងសុខមាលភាពសាធារណៈ។” ឯកឧត្តមបន្តទៀតថា “ដើម្បីសម្រេចបានចំណុចខាងលើ តម្រូវឲ្យមានការយកចិត្តដាក់យ៉ាងម៉ឹងម៉ាត់លើការកែទម្រង់ និងអភិបាលកិច្ចភាគី ដោយមានការចូលរួមពេញលេញពីគ្រប់ភាគី។ វេទិកា EIGF នឹងជាមូលដ្ឋានគ្រឹះមួយក្នុងការបង្កើតបាននូវអភិបាលកិច្ចមួយនេះ។
តម្លាភាព - គន្លឹះក្នុងការគ្រប់គ្រងភាគីពាក់ព័ន្ឋ និងក្តីរំពឹងរបស់សាធារណជន
អង្គការអុកស្វាម មានសេចក្តីសោមនស្សរីករាយ ដោយបានឃើញវិស័យឯកជន បានបោះជំហ៊ានឆ្ពោះទៅរកការអនុវត្តប្រកបដោយការទទួលខុសត្រូវ តាមរយៈការបើកទូលាយសម្រាប់ការពិភាក្សាជាមួយអង្គការសង្គមស៊ីវិល និងជាពិសេស ជាមួយសហគមន៍ដែលរងផលប៉ះពាល់ ផងដែរ។ ឆ្លើយតបទៅនឹងកត្តានេះ សង្គមស៊ីវិល នឹងបន្តដើរតួនាទីជាអ្នកផ្តល់យោបល់ក្នុងន័យស្ថាបនាដល់ភាគីក្រុមហ៊ុន និងរាជរដ្ឋាភិបាល។
លោកស្រី លឹម សូលីន នាយិកាអង្កការអុកស្វាម មានប្រសាសន៍ថា «យើងចូលរួមគាំទ្រដល់ការដឹកនាំរបស់ក្រសួងរ៉ែ និងថាមពល ដែលបានអនុវត្តកន្លងមក ក៍ដូចជាវិស័យឯកជន ដែលចូលរួមក្នុងការបង្កើតឲ្យមានវេទិកាជជែកពិភាក្សាគ្នា រួមទាំងការលើកកម្ពស់ការយល់ដឹងរបស់សាធារណៈជនផងដែរ។ ការមិនបើកចំហ ជាហេតុនាំអោយមានភាពមិនទុកចិត្តគ្នា។ តម្លាភាព គឺជាគន្លឹះសំខាន់សម្រាប់គ្រប់គ្រងការរំពឹងទុករបស់ភាគីពាក់ព័ន្ធ និងសាធារណជន ដែលនាំទៅរកភាពជោគជ័យក្នុងវិស័យនេះ។ វេទិកា EIGF បានផ្តល់នូវឱកាសសម្រាប់ការពិភាក្សាប្រកបដោយអត្ថន័យរវាងគ្រប់ភាគីរួមមាន សហគមន៍ រដ្ឋាភិបាល ក្រុមហ៊ុន និងភាគីដទៃទៀត ដើម្បីសម្រេចឲ្យបាននូវការវិនិយោគប្រកបដោយការទទួលខុសត្រូវលើវិស័យឧស្សាហកម្មនិស្សារណកម្មនៅកម្ពុជា។»
“តម្លាភាព គឺជាគន្លឹះសំខាន់សម្រាប់គ្រប់គ្រងការរំពឹងទុករបស់ភាគីពាក់ពន្ធ័ និងសាធារណៈជន ដែលនាំទៅរកភាពជោគជ័យក្នុងវិស័យនេះ។”