លោកជំទាវវេជ្ជបណ្ឌិត អ៊ឹង កន្ថាផាវី រដ្ឋមន្ត្រីនៃក្រសួងកិច្ចការនារី

Pineeh Pinoo, 2019 Resolution, Minister MoWA
“ក្នុងឆ្នាំ ២០១៩ នេះ ក្រសួងកិច្ចការនារីមានគោលដៅបន្តពង្រឹងកិច្ចអភិវឌ្ឍន៍ធនធានមនុស្សជាស្រ្តី និងធានាចំពោះការផ្តល់ភាពអង់អាចដល់ស្រ្តីលើផ្នែកសេដ្ឋកិច្ច”

អាណត្តិថ្មីនេះ ក្រសួង​កិច្ចការ​នារី​នឹង​បន្តពង្រឹង​សមត្ថភាព​ ក្នុង​ភាពជា​អ្នក​ដឹកនាំ​ដល់​ស្ត្រី ​ទាំង​ក្នុងវិ​ស័យ​នយោបាយ សង្គម និង​វិស័យដ្ឋកិច្ច​ទាំង​នៅក្នុង​ប្រទេស ​និង​ថ្នាក់​តំបន់។ ដើម្បី​ឆ្លើយ​តប​ទៅ​នឹងសកលភាវូប​នីយកម្ម ក្រសួង​កិច្ចការ​នារី​នឹង​យកចិត្ត​ទុកដាក់​ទៅលើ​ការ​កសាង​សមត្ថភាព​ធនធាន​មនុស្ស​ ជាពិសេស​ស្រ្តី ដើម្បី​ចូលរួម​ប្រកួត​ប្រជែង និង​ប្រកប​ដោយ​នវានុវត្តន៍​ក្នុង​ទីផ្សារ​ការងារ​ ក៏ដូចជា​បង្កើនសមត្ថភាព​របស់ពួកគេ​ដើម្បី​សម្រប​ខ្លួន​ទៅនឹង​ការ​ផ្លាស់​ប្តូរ និង​ការសិក្សា ​ដើម្បី​ក្លាយ​ទៅ​ជាសហគ្រិន និង​បុគ្គលិក​ដ៏ជោគជ័យ​ដើម្បី​រក្សា​កំណើន​សេដ្ឋកិច្ច​កម្ពុជា។

ដូចគ្នា​នេះ​ផងដែរ​ ពួក​យើង​នឹង​បន្ត​យក​ចិត្តទុក​ដាក់​លើការ​បង្កើន​សក្តានុពល​សេដ្ឋកិច្ច​ចំពោះ​ស្ត្រី​ដើម្បី​រួម​ចំណែក​ការកាត់​បន្ថយភាព​ងាយ​រងគ្រោះ​របស់​ពួកគេ និង​ពង្រឹង​ភាព​អង់អាច​របស់​ស្ត្រី​ក្នុង​តួនាទី​ជា​ដៃ​គូ​ដ៏មាន​តម្លៃ​ជាមួយ​បុរស​ក្នុង​សង្គម។ ដើម្បីអនុវត្ត​ផែនការ​នេះ ក្រសួង​សហការ​ជា​មួយ​ក្រសួង​ពាក់ព័ន្ធ​ដើម្បី​បន្ត​អប់រំ និង​ផ្សព្វផ្សាយ​ព័ត៌មាន​ដល់​ស្ត្រីពាក់ព័ន្ធ​នឹង​ច្បាប់ ដូចជា​ច្បាប់​ការងារ ដើម្បី​ការពារ​សិទ្ធិ​របស់​ពួកគេ រួម​ទាំង​បន្ត​អនុវត្ត​សកម្មភាព​លើកកម្ពស់​ជីវភាព​រស់​នៅ​របស់​បង​ប្អូន​ស្ត្រី ​នៅ​តាម​ជន​បទ​ឱ្យមាន​ជំនាញ​វិជ្ជា​ជីវៈ ​ដើម្បី​ប្រកប​មុខ​របរ​កសិកម្មក៏​ដោយ មិន​កសិកម្ម​ក៏​ដោយ ឱ្យ​ស៊ីសង្វាក់​ទៅនឹង​តម្រូវ​ការទីផ្សារ​សម្រាប់​ផលិត​ផល ​និង​អាជីវកម្ម​របស់ពួក​គេ។

ដើម្បីលើក​កម្ពស់​សុខុមាលភាព​ស្ត្រី និងកុមារ​ ក្រសួង​ចូលរួម​ជាមួយ​នឹង​ក្រសួង​ពាក់ព័ន្ធ ដើម្បី​អនុវត្តគោល​នយោបាយ​ថ្មី​របស់​រាជរដ្ឋាភិបាល​កម្ពុជា ពោល​គឺ​គោលនយោបាយ​គាំពារសង្គម​ ដើម្បី​ធានាថា “មិនទុកនរណាម្នាក់​ឱ្យនៅ​ឯកោ” ហើយ​ធានា​ថា ស្ត្រី ស្រ្តី​មាន​ផ្ទៃពោះ ​ក្មេង​ស្រី និង​ក្រុមងាយ​រងគ្រោះ ​ទទួល​បាល​អត្ថប្រយោជន៍​ពីកំណើន​សេដ្ឋកិច្ច​ដ៏រឹងមាំ​របស់​ប្រទេស​ជាតិ​យើង។

ដើម្បី​កាត់បន្ថយ​អំពើ​ហិង្សា​លើ​ស្ត្រី និង​កុមារ ក្រសួង​កិច្ចការ​នារី​សហការ​ជាមួយ​ក្រសួង​ពាក់ព័ន្ធ​នឹង​បន្តពង្រឹង​​ការ​អនុវត្ត​ផែនការ​ស្តីពី ការទប់​ស្កាត់​រាល់​ទម្រង់​នៃ​អំពើ​ហិង្សា​លើ​ស្ត្រី និង​ក្មេង​ស្រី ​២០១៩-២០២៣ និង​លើក​កម្ពស់​សីលធម៌​សង្គម តម្លៃ​ស្ត្រី និង​គ្រួសារ​ខ្មែរ។ យើង​នឹង​យកចិត្ត​ទុកដាក់​ខ្ពស់ ចំពោះ​សង្គម និង​ការអប់រំ​មូលដ្ឋាន​ ក្នុង​គោលដៅ​ដើម្បី​ផ្លាស់ប្តូរ​ផ្នត់​គំនិត​សង្គម​ដោយ​ប្រឆាំង​នឹង​ការ​រើស​អើង​ចំពោះ​ស្ត្រីភេទ​ ការ​ទទួល​ខុស​ត្រូវ​ខ្ពស់​នៃ​ការ​ពិសារ​គ្រឿង​ស្រវឹង​ និង​បង្ក្រាប​ការ​ប្រើប្រាស់​គ្រឿង​ញៀន។​ ​

ក្រសួងនឹង​ពង្រីក​ការអនុវត្ត​កម្ម​វិធី៑ “អប់រំ​កូនតាម​បែប​វិជ្ជមាន” រួម​ទាំង​សហការ​ជាមួយ​នឹង​ក្រុមគ្រួសារ​នៅ​គ្រប់មជ្ឈដ្ឋាន​ដើម្បី​អនុវត្ត​ផែនការ​នេះ។ ចំពោះ​បញ្ហា​អំពើ​ហិង្សា​ក្នុង​គ្រួសារ​ ពួកយើង​នឹង​បន្តពង្រឹង​វប្បធម៌សន្ទនា​ដើម្បី​ដោះស្រាយ​ជំលោះ និង​ពង្រីក​យុទ្ធនាការ​បុរស​ល្អ។ បញ្ហា​មួយទៀត​ដែល​យើង​គួរ​តែ​ចាប់អារម្មណ៍​ គឺ​ឥរិយាបថ​យុវវ័យ​ក្នុងការ​ប្រើប្រាស់​ប្រព័ន្ធ​បច្ចេកវិទ្យា ពួក​យើង​នឹង​បំផុស​ឱ្យ​យុវវ័យ​ឱ្យ​ប្រើប្រាស់ប្រព័ន្ធ​បច្ចេកវិទ្យា​ឱ្យមាន​ទំនួល​ខុសត្រូវ​ខ្ពស់​ដោយ​មិន​ប្រាស​ចាក​ពី​ទិសដៅ​នៃការ​អប់រំ ព័ត៌មាន និងចំណេះ​ដឹង។