ការពង្រឹងភាពជាអ្នកដឹកនាំ ការផ្លាស់ប្ដូរជីវិតនៅតំបន់ជនបទកម្ពុជា - បទពិសោធន៍វេទិកាស្រូវប្រកបដោយនិរន្តរភាពក្នុងឃុំប្រឡាយ

ក្រុមការងារអង្គការសន្សំម្លប់ព្រៃបណ្តុះបណ្តាលដល់កសិករផលិតកម្មស្រូវប្រកបដោយនិរន្តរភាព អំពីបច្ចេកទេសប្រមូលផលទឹក
ដែលហូលចោលសម្រាប់ផលិតកម្ម ខេត្តកំពង់ធំ ខែកញ្ញា ឆ្នាំ២០២១។ រូបថត៖ Boeng Phally/SMP

ពួកយើងបានចែករំលែកគំនិតថ្មីៗទាក់ទងនឹងបច្ចេកទេសក្នុងការស្តុកទុកទឹកដល់កសិករឯទៀត ហើយ បានសម្រេចចិត្តជីកស្រះធំៗដើម្បីធ្វើការបង្ហាញ។ ការពឹងផ្អែកលើទឹកភ្លៀងតាមរដូវមិនមែនជាជម្រើសល្អនោះ ទេ ដោយសារអាកាសធាតុប្រែប្រួល។
ថេង ថារ៉ា អ្នកសម្របសម្រួលគម្រោង SMP នៅស្រុកស្ទោង

បើបានទៅលេងឃុំប្រឡាយ យើងនឹងឃើញពីសម្ព័ន្ធភាពដ៏សុខដុមរវាងមនុស្ស និងធម្មជាតិ។ ឃុំប្រឡាយ ស្ថិតនៅកណ្តាលតំបន់អភិរក្សដ៏ធំមួយក្នុងស្រុកស្ទោង ខេត្តកំពង់ធំ។ កន្លងមក ប្រជាកសិករនៅឃុំប្រឡាយធ្វើការបង្កបង្កើនផលដាច់ដោយឡែកពីគ្នា ភាគច្រើនមិនតាមស្តង់ដារ និងបានទិន្ន​ផលមិនសូវខ្ពស់។ តំបន់នេះងាយនឹងជួបគ្រោះរាំងស្ងួត ហើយកសិករមានការពិបាកក្នុងការស្វែងរកប្រភពទឹក។

មនុស្សតិចណាស់ដែលគិតបែបសុទិដ្ឋិ​និយមថាអ្វីៗនឹងផ្លាស់ប្តូរ ដោយសារអ្នកឃុំប្រឡាយច្រើនប្រកបរបរស្រែចម្ការ តាមបែបប្រពៃណី។ កសិករជំនាន់ក្រោយៗបានប្រើបច្ចេកទេសបែបប្រពៃណីតាមបុព្វបុរសរបស់ខ្លួន ហើយក៏ទទួលផលតាមនោះដែរ។

កសិករម្នាក់នៅឃុំប្រឡាយឈ្មោះ លោក ផាត់ អឿន ដែលកំពុងជួបបញ្ហាអស្ថេរភាពសេដ្ឋកិច្ចនៅក្នុងជីវភាពប្រចាំថ្ងៃ និយាយថា៖ «អស់រយៈពេល២ឆ្នាំមកនេះ ស្រែខ្ញុំបានផល ប៉ុន្តែមិនដែលចំណេញ​នោះទេ។ ខ្ញុំថែមទាំងយកប្រាក់ខ្លួនឯងមកចំណាយលើការកិនស្រូវទៀត។» គាត់បារម្ភច្រើនអំពីការប្រែប្រួលអាកាស​ធាតុ ពោលគឺ មិនអាចធ្វើការប្រមូលផលនៅរដូវកាលក្រោយៗបាន។ អ្វីដែលកាន់តែពិបាកជាងនេះទៅទៀតនោះ គឺផលស្រូវរបស់គាត់ ពុំមានទីផ្សារលក់ចេញស្រួលឡើយ។

ជាដំណោះស្រាយ លោកអឿន បានងាកទៅរកគម្រោងផលិតកម្មស្រូវប្រកបដោយនិរន្តរភាព (SRP) ដែលអនុវត្តដោយអង្គការ សន្សំម្លប់ព្រៃ (SMP) នៅឆ្នាំ២០១៦។ នៅឆ្នាំ២០១៨ ដើម្បីពង្រីកគម្រោងនេះ អង្គការអុកស្វាម បានផ្តល់ជំនួយបន្ថែមលើការផ្លាស់ប្ដូរផ្នត់​គំនិតយេនឌ័រ តាមរយៈគម្រោងការកសាង​សមត្ថ​ភាព​ស្រ្ដី​និងការ​ផ្ដល់​អំណាច​សេដ្ឋកិច្ចដល់ស្រ្ដី និងការវិនិយោគលើវិស័យកសិកម្មប្រកប ដោយការទទួលខុសត្រូវនៅអាស៊ីអាគ្នេយ៍ ជំហានទី២ (GRSISEA 2) ដែលជួយឱ្យសម្រេចបានឱកាសផ្លាស់ប្តូរដល់បុរស និងស្ត្រីដែលមានការខ្វះខាតក្នុងវិស័យកសិកម្មនៅកម្ពុជា។

វគ្គបណ្តុះបណ្តាលដែលសម្របសម្រួលដោយ SMP បានធ្វើឱ្យកសិករដូចជាអឿន ទទួលបានចំណេះដឹងក្នុងការបង្កើន គុណភាព និងបរិមាណទិន្នផលស្រូវរបស់គាត់។ ជំនាញផ្សេងទៀតដែលបានបង្រៀន រាប់បញ្ចូលទាំងការធ្វើកសិកម្ម អាហារូបត្ថម្ភ និងការគ្រប់គ្រងការវេចខ្ចប់ ការរៀបដីមុនដាំ​ដុះ​ស្រូវ បច្ចេកទេសពេលប្រមូលផល និងក្រោយពេលប្រមូលផល របៀបថែទាំសុខភាព និងសុវត្ថិភាពល្អ និងសិទ្ធិការងារ។

អឿនបានចាប់ផ្ដើមដាំស្រូវសរីរាង្គដោយចំណាយ​តិចជាងមុន ហើយអាចទទួលបានតម្លៃពិសេសនៅទីផ្សារថែមទៀត។ អឿនធ្វើ​ស្រែ​បានល្អប្រសើរជាងមុន ហើយទទួលបានផលចំណេញចន្លោះពី ២០០រៀល (០.០៥ ដុល្លារ) ទៅ ៣០០រៀល (០.០៧ ដុល្លារ) ក្នុង​១គីឡូក្រាម ច្រើនជាងពេលដែលគាត់មិនទាន់បានចូលរួមកម្មវិធីនេះ។ គាត់យកប្រាក់បន្ថែម​របស់គាត់ ដើម្បីផ្គត់ផ្គង់ការសិក្សារបស់កូនៗគាត់ ទិញដីស្រែ និងគោបន្ថែមសម្រាប់ធ្វើស្រែចម្ការ។ សុខភាពផ្លូវចិត្តរបស់គាត់ក៏​បាន​ល្អប្រសើរជាងមុនដូចគ្នា។

ទោះបីជំនាញដែលអឿនទទួលបានត្រូវបានគេឱ្យតម្លៃខ្ពស់ ជំនាញទាំងនោះមុខជាមិនសូវមានប្រយោជន៍ ប្រសិនបើគ្មានជំនួយពីរបៀប នៃការគ្រប់គ្រងទឹកឱ្យប្រសើរទេនោះ។ កសិករបានជីកស្រះចំនួន៥ ហើយកំពុងបន្តជីកចំនួន៣​បន្ថែម​ទៀត។ តាមការលើកឡើងរបស់ថារ៉ា ស្រះទាំងនេះ ជាតឹកតាងបង្ហាញថាការទុកដីតូចៗរបស់កសិករធ្វើអាងស្តុកទឹកនឹងនាំផលល្អដល់ពួកគាត់។

ការសាកល្បងមុន និងបន្ទាប់ពីវគ្គបណ្តុះបណ្តាលបច្ចេកទេសប្រមូលទឹក ដែលរៀបចំឡើងដោយអង្គការ SMP ទៅកសិករផលិតកម្មស្រូវប្រកបដោយនិរន្តរភាព ដើម្បីពិនិត្យមើលកម្រិតយល់ដឹងរបស់កសិករអំពីរបៀបគ្រប់គ្រងប្រព័ន្ធទឹកមុន ខេត្តកំពង់ធំ ខែកញ្ញា ឆ្នាំ២០២១។ Boeng Phally/SMP

សហគមន៍បានកត់សម្គាល់ឃើញថា ស្រូវនៅក្បែរស្រះផ្តល់ទិន្នផលចន្លោះពី ២ទៅ៣ដង នៃទិន្នផលមធ្យមធៀបទៅនឹងស្រូវដែលមិននៅក្បែរស្រះ។ ប្រជាកសិករជាច្រើននៅក្នុងភូមិជឿថាស្រះទឹកទាំងនោះពិតជាសំខាន់ក្នុងការផ្លាស់ប្ដូរតំបន់ដាំដុះនោះ ហើយសង្ឃឹមថា SMP ជាមួយនិង GRAISEA 2 នឹងបន្តផ្ដល់ជាជំនួយបច្ចេកទេសដល់សហគមន៍នេះ។

គម្រោងនេះកំពុងបង្ហាញយ៉ាងជាក់ច្បាស់ថាការបណ្តុះ​បណ្តាល​ និងការដឹកនាំអនុវត្ត ជាមធ្យោបាយសំខាន់ដែលជំរុញឱ្យមានការផ្លាស់ប្តូរនៅកម្រិតមូលដ្ឋាន។ ថារ៉ា បានបន្តថា៖ «គម្រោងនេះស្ថិតក្នុងដំណាក់កាលចាប់ផ្ដើមនៅឡើយ ប៉ុន្តែវាបានផ្តល់គុណប្រយោជន៍ជាច្រើនដល់សហគមន៍​រួចទៅហើយ។» «គម្រោង GRAISEA 2 របស់អង្គការអុកស្វាម ដែលអនុវត្តដោយ SMP អាចចូលរួមលើកកម្ពស់ជីវភាពរបស់ប្រជាជនដូចបានឃើញជាក់ស្តែង ហើយយើងជឿជាក់ថាអត្ថប្រយោជន៍ ជាច្រើនទៀតរាប់មិនអស់អាចនឹងកើតមាន ប្រសិនបើសិនគម្រោងនេះត្រូវបានចែករំលែកទៅកាន់សហគមន៍ផ្សេងៗទៀតនៅទូទាំងប្រទេសកម្ពុជា។»