Click HERE to read the article in English

ក្រុមប្រឹក្សាភិបាលនៃមូលនិធិរូបិយវត្ថុអន្តរជាតិ (IMF) បានអនុម័តការវិភាជថវិកាទូទៅមួយ​ពី​​គណនីមូលនិធិពិសេស (the largest Special Drawing Rights (SDRs)) ជាប្រវត្តិសាស្ត្រ ដែលស្មើនឹង​ ៦៥០ ពាន់លានដុល្លារ ស.រ.អា (ប្រហែល ៤៥៦ ពាន់លាន SDR) កាល​ពី​ដើមខែ​សីហានេះ ដើម្បីជម្រុញលទ្ធភាព​ទូទាត់ការ​ចំណាយ​របស់​សកលលោក។ កម្ពុជានឹង​ទទួល​បានចំនួន ០,២៤ពាន់លាន ដុល្លារ ស.រ.អា ។

លោកស្រី លីម សូលីន នាយិកាប្រចាំប្រទេសនៃអង្គការ អុកស្វាម មានប្រសាសន៍ថា “ថវិកា SDRs ថ្មីនេះ នឹងជួយប្រទេស​កំពុង​អភិវឌ្ឍន៍ រួមទាំង​កម្ពុជា​ផងដែរ ដើម្បីដោះស្រាយ​ផលប៉ះពាល់​នៃជំងឺកូវីដ-១៩ និងស្តារសេដ្ឋកិច្ច​របស់ខ្លួន​ឡើងវិញ ។ រហូតមកដល់ពេលនេះ រាជរដ្ឋាភិបាលកម្ពុជា​បាន​ធ្វើការងារ​យ៉ាងល្អ​ដើម្បី​ទប់ស្កាត់​ការចម្លង​មេរោគ​នេះ​ ព្រមទាំង​គាំទ្រ​ក្រុម​ប្រជាជន​ងាយរងគ្រោះ ក្នុង​ការដោះ​ស្រាយ​ការបាត់បង់​មុខ​របររបស់ពួកគេ តាមរយៈការអនុវត្ត​កម្មវិធីផ្ទេរ​សាច់ប្រាក់ ដោយផ្អែកលើ​ប្រព័ន្ធ​ជំនួយ​សង្គម​របស់ខ្លួន ។ ទោះជាយ៉ាងណា​ក៏ដោយ នៅមានកិច្ចការ​ចាំបាច់​ជាច្រើនទៀត​ ដែល​គួរធ្វើ ហើយយើងសូម​អំពាវ​ឱ្យរាជរដ្ឋាភិបាល​បន្តធ្វើការ​ប្រកបដោយ​តម្លាភាព និងរួមគ្នា​ជាមួយ​អង្គការសង្គមស៊ីវិល​ដទៃទៀត​ដើម្បី​ប្រើប្រាស់​ហិរញ្ញប្បទា​នឥតសំណង​បន្ថែមនេះ​ឱ្យបាន​ល្អបំផុត ឧទាហរណ៍ ដោយផ្តល់អាទិភាព​លើការ​ថែទាំសុខភាព​ជាសកល និងការវិនិយោគ​លើកិច្ចគាំពារសង្គម ដែលអាច​កាត់​បន្ថយវិសមភាព ដើម្បីសម្រេច​បានការងើប​ឡើងវិញ​ពីជំងឺរាតត្បាត​ជាសកល​នេះប្រកប​ដោយលក្ខណៈប្រកបដោយ​សមភាព និងកាន់តែ​មាន​និរន្តរភាព​ថែមទៀត” ។

បច្ចុប្បន្ននេះ វិស័យសេដ្ចកិច្ចក្រៅប្រព័ន្ធ​តំណាងឱ្យ ៨៧.៥% នៃសេដ្ឋកិច្ចកម្ពុជា (យោងតាម ILO ២០២១) ហើយក្រសួងផែនកា​របានលើកឡើងថា កម្មករសេដ្ឋកិច្ចក្រៅប្រព័ន្ធចំនួន ៦ លាននាក់ កំពុងប្រឈម​នឹងការបាត់បង់​មុខរបរ​របស់ពួកគេ នៅខណៈពេលដែលជំងឺរាតត្បាត​ជាសកលនេះ​នៅតែបន្ត ។ ដូច្នេះ រាជរដ្ឋាភិបាលកម្ពុជា​ចាំបាច់ត្រូវ​ធានាថាកម្មវិធីផ្តល់​ជំនួយសង្គ្រោះ​របស់ខ្លួន ផ្តោតការយកចិត្តទុកដាក់​ ជាពិសេស​ទៅលើ​ការគាំទ្រ​កម្មករ​សេដ្ឋកិច្ចក្រៅប្រព័ន្ធ និងអាជីវកម្មធុនតូច និងមធ្យម ដែល​ជាឆ្អឹងខ្នង​នៃសេដ្ឋកិច្ចកម្ពុជា។

លោកស្រី លឹម សូលីន បានបន្ថែមទៀតថា “យើងសូម​កោតសរសើរ​ដល់រាជរដ្ឋាភិបាលកម្ពុជា ដែលបាន​ខិតខំប្រឹងប្រែង​ធានា​ថាក្រុមងាយរងគ្រោះនានាដូចជា ស្ត្រី និងក្មេងស្រីដែលប្រឈមនឹងអំពើហិង្សាផ្លូវភេទ និងអំពើហិង្សាពាក់ព័ន្ធយេនឌ័រ ស្ត្រីមានផ្ទៃពោះ កុមារ ជនមានពិការភាព ជនជាតិដើម និងជនជាតិភាគតិច អ្នករស់នៅជាមួយ​មេរោគអេដស៍ ជនអនាថា និងជនទេសន្តរប្រវេសន៍ដែលវិលត្រឡប់មកប្រទេសវិញ គឺជាទទួលបានអត្ថប្រយោជន៍ពីកម្មវិធីជំនួយកូវីដ-១៩ ហើយយើងសូមលើកទឹកចិត្តដល់រាជរដ្ឋាភិបាលកម្ពុជា ឱ្យទាញយកផលប្រយោជន៍ពីមូលនិធិ SDR នេះ ដើម្បីផ្តល់ការគាំទ្របន្ថែមទៀត និងធ្វើឱ្យអន្តរាគមន៍​ឆ្លើយតប​ជំងឺរាតត្បាត​មានលក្ខណៈ​បរិយាប័ន្ន ។ ប្រជាជនកម្ពុជា ជាពិសេស ក្រុមងាយរងគ្រោះបំផុត នឹងចងចាំ​ទុក​ក្នុងចិត្ត​នូវ​ស្នាដៃ​ដ៏​សំខាន់​នេះ”។

SDRs គឺជាទម្រង់​នៃរូបិយប័ណ្ណសកល​មួយដែល​អាច​ចាក់បញ្ចូល​ទៅក្នុង​សេដ្ឋកិច្ចសកលលោក ដោយ​ធ្វើការបែងចែក​ជំនួយ​ដោយ​មិនចាំបាច់សង​វិញ ជូនដល់​ប្រទេសជាសមាជិក​នីមួយៗ​របស់មូលនិធិរូបិយវត្ថុអន្ដរជាតិ ។ ថវិកានេះ​មិនមែន​ជាកម្ចីដែល​ត្រូវការសង​វិញនោះទេ ហើយការ​ប្រើប្រាស់មូលនិធិនេះគឺជាការសម្រេចចិត្ត​ដោយប្រទេសដែលទទួល​មូលនិធិនេះ។

SDRs ថ្មីនេះ នឹងចូលជាធរមាន​នៅថ្ងៃទី ២៣ ខែសីហា ឆ្នាំ ២០២១ ។ ថវិកានេះត្រូវបានបែងចែក​ដោយផ្អែកលើកូតា/ចំណែករបស់ប្រទេសនីមួយៗ​នៅក្នុង IMF ។ ការផ្តល់ថវិកា SDR ចំនួន ៦៥០ ពាន់លានដុល្លារនេះ នឹងផ្តល់ប្រាក់បម្រុង​បន្ថែមជិត ៤០០ ពាន់លានដុល្លារ ដល់ប្រទេស ដែលមានជាងគេ​បំផុតក្នុង​ពិភពលោក, ២៣០ ពាន់លានដុល្លារ ដល់ប្រទេស​ដែលមានប្រាក់ចំណូល​មធ្យម និង ២១ ពាន់លានដុល្លារ ដល់ប្រទេស​ដែលមានប្រាក់ចំណូលទាប ។

អុកស្វាម គឺជាអង្គការមួយ​ក្នុងចំណោមអង្គការ​ដំបូងគេ ដែលបាន​អំពាវនាវ​ឱ្យមានការផ្តល់ថវិកា SDR ថ្មី ជាផ្នែកមួយ​នៃផែនការ សង្គ្រោះសេដ្ឋកិច្ច​ទូលំទូលាយ​មួយ នៅពេលវិបត្តិនេះ​បានកើតឡើង​ក្នុងឆ្នាំ ២០២០ ។ នៅក្នុងលិខិតចំហ​មួយ, អង្គការ អុកស្វាម និងក្រុមសង្គមស៊ីវិល​ជាង ២០០ ផ្សេងទៀត បានជំរុញ​ឱ្យប្រទេស G20 គាំទ្រ​ការផ្តល់ថវិកា SDRs ដើម្បីជួយ​ប្រទេស​នានា ដោះស្រាយវិបត្តិជម្ងឺរាតត្បាតជាសកលកូវីដ-១៩ ។

ទស្សនវិស័យសេដ្ឋកិច្ច​កំពុងមានភាពមិន​ប្រាកដប្រជា ហើយវិថី​នៃការងើប​ឡើងវិញ​សម្រាប់ប្រទេសកម្ពុជា ក៏ដូចជា​ប្រទេសទាំងអស់ គឺវែងឆ្ងាយណាស់ និងជួបឧបសគ្គជាច្រើន​ សម្រាប់រយៈពេល​ជាច្រើនឆ្នាំ​ខាងមុខ ហើយយើងជឿជាក់ថា ប្រជាជនកម្ពុជា និងរាជរដ្ឋាភិបាលកម្ពុជា នឹងជំនះ​បញ្ហាប្រឈម​ដែលមិនធ្លាប់​មានពីមុនមកនេះ។