Remarks by Oxfam: Non-Communicable Diseases in Cambodia

Wednesday, July 1, 2020

សុន្ទរកថាស្វាគមន៍ របស់លោកស្រី​ សុខ ច័ន្ទឆវី ប្រធានកម្មវិធីអង្គការអុកស្វាម

សិក្ខាសាលាពិគ្រោះយោបល់ថ្នាក់ជាតិ​ស្តីពី​សេចក្តីព្រាងរបាយការណ៍

“ការវិភាគទិដ្ឋភាពគោលនយោបាយស្តីពី​ជំងឺអត់ឆ្លង​នៅក្នុងប្រទេសកម្ពុជា”

សណ្ឋាគារកាំបូឌីយ៉ាណា ថ្ងៃទី១ ខែកក្កដា ឆ្នាំ២០២០

សូមគោរព និងសូមស្វាគមន៍យ៉ាងកក់ក្ដៅចំពោះវត្តមានដល់លោកជំទាវ ឯកឧត្ដម លោក លោកស្រី ទាំងអស់

តាងនាម​ឲ្យអង្គការអុកស្វាម នាងខ្ញុំ​មាន​កិតិ្តយស និងសេចក្តីរីករាយ​យ៉ាងក្រៃលែង ដោយបានមកចូលរួម​នៅក្នុង​កិច្ចប្រជុំ​ពិគ្រោះយោបល់ថ្នាក់ជាតិ ស្តីពី សេចក្តីព្រាងរបាយការណ៍​ ការវិភាគទិដ្ឋភាព​គោលនយោបាយ​ពាក់ពន្ធ័នឹង​ជម្ងឺអត់ឆ្លង ដែល​មាន​នៅក្នុង​ប្រទេសកម្ពុជា នាថ្ងៃនេះ ។ មុននឹង​យើងយល់​ទាំងអស់គ្នា​អំពី​ថា​តើអ្វី​ទៅ​ដែល​ជា​ជម្ងឺអត់ឆ្លង ហើយតើជម្ងឺ​ទាំងនេះ​មានផលប៉ះពាល់យ៉ាងណា​នោះ ខ្ញុំសូមអនុញ្ញាតិ​ថ្លែងអំណរគុណ​ដល់​ក្រុមការងារថវិកាជាតិ​ (Budget Working Group) ដែលមាន​សមាជិកភាពមកពី​អង្គការសង្គមស៊ីវិល​ជាតិ និងអន្តរជាតិ​ចំនួន​១២ ដែល​បាន​រួមសហការ​លើ​ការសិក្សា​ស្រាវជ្រាវ​ដ៏មាន​សារសំខាន់នេះ ។

សូមថ្លែងអំណរគុណ​ដល់វេទិកា​នៃអង្គការមិនមែនរដ្ឋាភិបាល ស្តីពីកម្ពុជា (NGOF) ដែលបានដើរ​តួរជាលេខាធិការដ្ឋាន​សម្របសម្រួល​ដល់​ក្រុមការងារថវិកាជាតិ។ អង្គការអុកស្វាម​ មានសេចក្តីរីករាយយ៉ាងខ្លាំង​ដោយបាន​សហការ និងគាំទ្រ​ទាំងបច្ចេកទេសក្នុងការពង្រឹងសមត្ថភាព ក៏ដូចជា ហិរញ្ញវត្ថុដល់ក្រុមការងារថវិកាជាតិ ជាពិសេសដល់​ NGOF ដែលជាលេខាធិការដ្ឋាន​សម្របសម្រួល​ដល់ក្រុមការងារផ្នែកថវិកាជាតិ ក្នុងគោលដៅ​រួមចម្បងគឺ ការកាត់បន្ថយភាពក្រីក្រ និងវិសមភាព​ក្នុងសង្គម រួមទាំងវិសមភាព​ផ្នែក​សេដ្ឋកិច្ច វិសមភាព​ផ្នែកសង្គម វិសមភាព​ផ្នែកយេនឌ័រ ក៏ដូចជា​ផ្នែកនយោបាយ តាមរយៈគោលនយោបាយ​សារពើពន្ធ័ (Inclusive and Pro-poor Fiscal Policy of Fiscal Justice) ដែល មានលក្ខណៈគ្រប់​ជ្រុងជ្រោយ និងផ្តល់អាទិភាព និងយកចិត្តទុកដាក់​ចំពោះក្រុមជន​ដែល​ងាយរងគ្រោះ ក្រុមជនដែលស្ថិតជាប់នឹង​ខ្សែបន្ទាត់​នៃភាពក្រីក្រ ជាពិសេសស្រ្តី និងក្មេងស្រី។

ជាក់ស្តែង កិច្ចពិភាក្សា​ពិគ្រោះយោបល់​ជាមួយ​ភាគីពាក់ពន័្ធ​នាថ្ងៃនេះ គឺជាកិច្ចខិតខំ​ប្រឹងប្រែង​ដ៏សំខាន់ ដើម្បី​កំណត់​ឲ្យ​បាន​ច្បាស់​នូវ​ផលលំបាក និងផលប៉ះពាល់​ដែល​បណ្តាល​មកពី​ជម្ងឺ​អត់ឆ្លង​ទៅលើប្រជាជន ជាពិសេស​ចំពោះស្រ្តី និង​ក្រុមជន​ដែល​ងាយរងគ្រោះ ក៏ដូចជា ការពិនិត្យ​មើល​ទៅ​លើគោលនយោបាយ និងការដោះស្រាយ​របស់​រដ្ឋាភិបាល ក្នុង​ការកាត់បន្ថយបញ្ហាទាំងអស់នេះ។​ កំហើញទាំងអស់នេះ គឺទុនសម្រាប់​ភាគីពាក់ព័ន្ធ ដើម្បីស្វែង​រកយុទ្ធសាស្ត្រ គាំទ្រ និងលើកកម្ពស់​សេវាសាធារណៈ​ចាំបាច់នានា ដើម្បីឆ្លើយតប​ទៅនឹង​ជម្ងឺអត់ឆ្លង​នៅក្នុង​ប្រទេសកម្ពុជា ដែលមាន​អាត្រាខ្ពស់រហូតទៅដល់​៦៤% ​នៃអត្រាមរណៈ​សរុប​នៅឆ្នាំ២០១៨​​ ហើយ​ដែល​បាន​ដាក់បន្ទុក​យ៉ាងធ្ងន់ធ្ងរ​ទៅលើ​សេដ្ឋកិច្ចជាតិ​តាមរយៈតម្រូវ​ការ​ក្នុង​ការព្យាបាល និងថែទាំជម្ងឺ និងការថមថយចុះ​នូវផលិតភាព​ការងារ។

អង្គការអុកស្វាម ជឿជាក់​យ៉ាងមុតមាំ​ថា ភាគីពាក់ព័ន្ធ​គ្រប់គ្នា ជាពិសេស រាជរដ្ឋាភិបាល និងអង្គការដៃគូអភិវឌ្ឍន៍ជាតិ និងអន្តរជាតិ អ្នកផ្តល់ជំនួយ នឹងយកចិត្តដាក់​រួមគ្នាឆ្លើយតប​នឹងអនុសាសន៍​ដែលបានស្នើឡើង រៀបចំ​គោលនយោបាយ​ប្រកបដោយបរិយាបន្ន ដែលជា​ប្រយោជន៍​ដល់ក្រុមងាយរងគ្រោះបំផុត បង្កើនថវិកា​ដើម្បីកាត់បន្ថយ​នូវបញ្ហាជម្ងឺអត់ឆ្លង​ទាំងនេះ ជាពិសេស ចំពោះស្រ្តី និងក្រុមជន​ដែលងាយរងគ្រោះ។អុកស្វាម​ជាមួយនឹង​ក្រុមការងារ​ផ្នែកថវិកាជាតិ នឹង​បន្តកិច្ចពិភាក្សា ជាមួយស្ថាប័នពាក់ពន្ធ័​ជាតិ និងអន្តរជាតិ និងសង្គមស៊ីវិល ដើម្បី​រួមសហការ​គ្នាកាត់បន្ថយ​បញ្ហាជម្ងឺអត់ឆ្លង​របស់ស្ត្រី​ដែល​ងាយរងគ្រោះ និងក្រុមជន​ដែលងាយរងគ្រោះ​នៅក្នុងប្រទេសកម្ពុជា

ជាទីបញ្ចប់នេះ ខ្ញុំសូមគោព​ជូនពរដល់អង្គសិក្ខាសាលា​ទាំងមូល ទទួល​បានជោគជ័យ​តាម​ការរំពឹងទុក។ សូមគោរពជូន​ពរលោកជំទាវ ឯកឧត្ដម​ លោកស្រី លោក ទទួលបាននូវសុខភាពល្អ​ និងទទួលបានជោគជ័យ​គ្រប់ភារកិច្ច ។​ សូមអរគុណ!

All photos by: Yu Phourn/NGOF