Speech: 10th International Domestic Workers Day - Our Value, Our Rights

Wednesday, June 16, 2021

មតិចូលរួមរបស់តំណាងអង្គការអុកស្វាមកម្ពុជា

លោក តាន់ វិសាល អ្នកសម្របសម្រួលគម្រោងកិច្ចគាំពារសង្គម

ទិវាកម្មករការងារផ្ទះអន្តរជាតិលើកទី១០ ស្តីពី

“តម្លៃយើង ​សិទ្ធិយើង”

ថ្ងៃពុធ ទី ១៦ ខែមិថុនា ឆ្នាំ ២០២១

សូមជម្រាបសួរ នាងកញ្ញា លោក លោកស្រី ដែលមានវត្តមានតាមបណ្តាញសង្គមនាពេលនេះ

តាងនាម​ឲ្យ​អង្គការអុកស្វាម​នៅក្នុង​ប្រទេសកម្ពុជា ខ្ញុំមានកិត្តិយស​យ៉ាងក្រៃលែង ដែលបានចូលរួមក្នុង​ទិវាកម្មករការងារផ្ទះ​អន្តរជាតិ​លើកទី១០ នាពេលនេះ ។ សូ​មថ្លែងអំណរគុណដល់ សមាគមប្រជាធិបតេយ្យ​ឯករាជ្យនៃសេដ្ឋកិច្ចក្រៅប្រព័ន្ធ (IDEA) ​ដែលបានរៀបចំ​កម្មវិធីដ៏មាន​សារៈសំខាន់នេះ​ ដើម្បីជាការរំលឹក អបអរ និងបង្កើននូវចំណេះដឹង​ជាសាធារណៈ​អំពី​ការចូលរួម​ចំណែកដ៏​សំខាន់​របស់កម្មករការងារ​តាម​ផ្ទះ​ដែលភាគ​ច្រើនលើស​លុប​ជាស្រ្តី ។

កម្មករការងារផ្ទះ បានចូលរួម យ៉ាងសកម្មក្នុងការ​រកប្រាក់ចំណូល បង្កើនសុខមាលភាព​សង្គម​ ធ្វើឲ្យ​មានចរន្ត​ការងារគ្រប់​វិស័យ និងរួមចំណែក​ទៅក្នុង​ការអភិវឌ្ឍសង្គម និងសេដ្ឋកិច្ចជាតិ។

ជាអកុសលក្នុងពេលនេះ កម្មករក្រៅប្រព័ន្ធទាំងអស់​រួមទាំងកម្មករការងារ​តាមផ្ទះ​ផង​ដែរ កំពុងតែជួបវិបត្តិ​យ៉ាងធ្ងន់ធ្ងរ​ដោយសារ​គ្រោះមហន្តរាយ​នៃជំងឺកូវីដ១៩ ដែលធ្វើ​ឲ្យកម្មករ​បាត់បង់​ការងារ​ធ្វើ បាត់បង់​ចំណូល កើននូវបំណុលវ័ណ្ឌ​ក និងសុខភាពផ្លូវចិត្ត​ថមថយ ។ ជាឧទាហរណ៍ ប្រពន្ធរបស់ខ្ញុំក៏ប្រកបរបរក្រៅប្រព័ន្ធ​ផងដែរ គឺបើក​អាហារដ្ឋានតូចមួយ​ដែលមានកម្មករ​ចំនួន៣នាក់​ ដែលក្នុងរយៈពេលដ៏លំបាក​នៃវិបត្តិកូវីដ​១៩នេះ យើងត្រូវ​បិទហាង​ជាង ៣ខែ គាត់បាត់បង់​ចំណូល គាត់ខូចចិត្ត គាត់ស្មុគ្រស្មាញ កម្មករទាំងអស់​ត្រូវបាត់ការងារ និងប្រាក់ខែ ប៉ុន្តែ​ជា​សំណាង​ដែល​ខ្លួនខ្ញុំ​នៅមាន​ការងារ​ធ្វើ​អាច​នៅជាជំហរបានខ្លះ ចុះកម្មករ​ដែលពួកគាត់​មាន​ចំណូល​តែមួយមុខ​ពីការងារ​របស់ខ្លួន​ដែល​ត្រូវ​ជាជំហរគ្រួសារ​ដែរនោះ តើពួកគាត់​លំបាក​យ៉ាងណា?

ខ្ញុំសូមលើកទឹកចិត្ត​ឲ្យកម្មករការងារផ្ទះ​ទាំងអស់ ស្ថិតក្នុងជំហររឹងមាំ​ជានិច្ច បន្តនូវ​សាម្គីភាព បន្តនូវការចងក្រងគ្នា​ជាក្រុម​រឹងមាំ បន្តពង្រឹង​សមត្ថភាព និងបន្តចូលរួម​ក្នុងការតស៊ូមតិ ។​

តម្លៃយើង ​សិទ្ធិយើង! កម្មករការងារផ្ទះ​ត្រូវការ​ការងារ​សមរម្យ ត្រូវការសុវត្ថិភាព​នៅកន្លែងធ្វើការ ត្រូវការរបប​នៃកិច្ចគាំពារ​សង្គម​ពេញលេញ ។

ត្រូវបញ្ឈប់រាល់ការរើសអើង និងការបៀនបៀន! មិនត្រូវមានដាច់ខាត​នូវពាក្យថា​ខ្ញុំគេ កញ្ជះគេ ឬទាសករ! យើងជាកម្មករការងារតាមផ្ទះ!

ថ្ងៃនេះជាខួបលើកទី១០នៃអនុសញ្ញាពលកម្មអន្តរជាតិលេខ១៨៩ ស្តីពី​កម្មករ​ការងារ​តាមផ្ទះ ដូច្នេះ យើងខ្ញុំសូមទទូច និងលើកទឹកចិត្ត​យ៉ាងខ្លាំងដល់រាជរដ្ឋាភិបាលកម្ពុជា​ក្នុងការផ្តល់នូវ សច្ចាប័ន្ន ដល់អនុសញ្ញាពលកម្ម​អន្តរជាតិលេខ ១៨៩ នេះឲ្យបានឆាប់រហ័ស​ដើម្បី​ជា​ប្រយោជន៍​ដល់​កម្មករការងារ​ផ្ទះទាំងអស់

យើងខ្ញុំសូមថ្លែង​អំណរគុណ​ផងដែរដល់រាជរដ្ឋាភិបាលកម្ពុជា ដែលបានយកចិត្តទុកដាក់ក្នុងការបញ្ចូលកម្មករការងារផ្ទះ​ទៅក្នុងច្បាប់សន្តិសុខសង្គម ប៉ុន្តែយើងខ្ញុំ​សូមឲ្យមានការអនុវត្តច្បាប់នេះ​ឲ្យបានឆាប់ និងទូលំទូលាយ​ដល់កម្មករការងារផ្ទះ និងដល់កម្មករក្រៅប្រព័ន្ធ​ដទៃទៀតផងដែរ ។

អង្គការអុកស្វាម​នឹងបន្តគាំទ្រដល់​សមាគម IDEA ទាំងថវិកា និងបច្ចេកទេសយូរអង្វែងទៅមុខទៀតក្នុង​បេសកកម្មដ៏​មានសារៈសំខាន់ និង​ដ៏លំបាក​មួយនេះ។

ជាចុងបញ្ចប់ ខ្ញុំសូមគោរពជូនពរ​ដល់នាងកញ្ញា លោក លោកស្រី និងអ្នកចូលរួម​ទាំងអស់ ឲ្យមានសុខភាពល្អ និងជោគជ័យ​ក្នុងការងារ។ ជយោ! កម្មករការងារតាមផ្ទះ