Speech: 7th International Street Vendors' Day

Monday, November 18, 2019

មតិ​ចូល​រួម​របស់​ លោក​ស្រី​ សុខ​ ច័ន្ទ​ឆវី​

ប្រធាន​កម្មវិធី​ អង្គការ​អុកស្វាម​កម្ពុជា​

ទិវា​អន្តរជាតិ​ ចំពោះ​អ្នក​លក់​ដូរ​តាម​ដង​ផ្លូវ​ ១៤ វិច្ឆិកា​ លើក​ទី​​ ០៧​

ថ្ងៃ​ទី​​ ១៨​ វិច្ឆិកា​​ ឆ្នាំ​ ២០១៩​

សូម​ជម្រាប​សួរ​ នាង​កញ្ញា​ លោក​ លោក​ស្រី​ ដែល​មាន​វត្តមាន​នៅ​ទីនេះ​

សូម​គោរព​ គណៈអធិបតី​ និង​តំណាង​មក​ពី​អង្គការ​ជាតិ ​និង​អន្តរជាតិ​ ជាទី​គោរព​!

ជាដំបូង នាងខ្ញុំសូមគោរព និងថ្លែងអំណរគុណដោយស្មោះដល់បងប្អូន ពូមីង ដែលបានចំណាយពេលមកចូលរួមតាំងពីព្រលឹម។ អ្នកប្រកបរបរតាមដងផ្លូវ គឺជាកម្លាំងចលករដ៏សំខាន់នៅក្នុងសង្គមដែលមិនអាចខ្វះបាន ជាពិសេសនៅក្នុងប្រទេសកម្ពុជា ដែលជាប្រទេសកំពុងអភិវឌ្ឍ។ 

តាង​នាម​ឲ្យ​អង្គការ​អុកស្វាម​​នៅ​ក្នុង​ប្រទេស​កម្ពុជា​​​​​​​ ខ្ញុំ​មាន​កិត្តិយស​យ៉ាង​ក្រៃ​លែង​ដែល​បាន​ចូល​រួម​ក្នុង​ទិវា​អ្នក​លក់​ដូរ​តាម​ដង​ផ្លូវ​អន្តរជាតិ​លើក​ទី​ នា​ពេល​នេះ​។ សូ​ម​ថ្លែង​អំណរ​គុណ​ដល់​ សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​ និង​អង្គការ​មជ្ឍមណ្ឌល​សាមគ្គីភាព​ តំណាង​អង្គការ​នានា​ ដែល​បាន​សហការ​ជាមួយ​អង្គការ​អុកស្វាម​ ​ក្នុង​ការ​រៀប​ចំ​វេទិកា​ដ៏​មាន​​សារៈ​សំខាន់​នេះ​​ ដើម្បី​ជា​ការ​រំលឹក​ និង​បង្កើន​ការ​យល់ដឹង​ជា​សាធារណៈ​អំពី​ការ​ចូល​រួម​ចំណែក​ដ៏​សំខាន់រ​បស់​អ្នក​លក់​ដូរ​តាម​ដង​ផ្លូវ​ ទៅ​ក្នុង​ការ​អភិវឌ្ឍ​សេដ្ឋកិច្ច​គ្រួសារ​ និង​សេដ្ឋកិច្ច​​ជាតិ និង​ការ​ប្រឈម​ចម្បង​ៗ​របស់​ពួកគេ​។​

នៅ​ក្នុង​ប្រទេស​កម្ពុជា​ ក៏​ដូច​ជា​ប្រទេស​ដទៃ​ទៀត​ក្នុង​ពិភព​លោក​ អាជីវកម្ម​ អាជីវករ​​ ឬ​អ្នក​លក់​ដូរ​តាម​ដង​ផ្លូវ​ មាន​ចំនួន​កើន​ឡើង​ជា​លំដាប់​ និង​ឆាប់​រហ័ស​ ព្រោះ​វា​ជា​ប្រភព​ការងារ​​ និង​ប្រភព​ចំណូល​យ៉ាង​សំខាន់​សំរាប់​គ្រូសារ​ដែល​​​មាន​ជីវភាព​កម្រិត​ទាប​។ យើង​បាន​ដឹង​ហើយ​ថា​ អ្នក​លក់​ដូរ​តាម​ដង​ផ្លូវ​ គឺ​ជា​អ្នក​លក់​ដូរ​ឥវ៉ាន់​ ម្ហូប​អាហារ​ បន្លែ​បង្កា​ ប៉ះ​កង់​ម៉ូតូ​ និង​ទំនិញ​ផ្សេង​ៗ​​ទៀត​នៅ​តាម​ទី​សាធារណៈ​ ហើយ​ជា​រួម​ គ្មាន​ទី​តាំង​រឹង​មាំ​ ឬ​ជាក់​លាក់​ឡើយ​។ អ្នក​លក់​ដូរ​តាម​ដង​ផ្លូវ​ ប្រើ​ប្រាស់​ចិញ្ចើម​ផ្លូវ​ ឬ​ទី​តាំង​ឯកជន​ ឬ​សាធារណៈ​ ហើយ​ក៏​​អាច​ធ្វើ​ការ​បំលាស់​ទី​ពី​កន្លែង​មួយ​ទៅ​កន្លែង​មួយ​ ​ដើម្បី​លក់​ដូរ​ ឬ​ប្រកប​អាជីវកម្ម​។ បើ​តាម​តួ​លេខ​របស់​វិទ្យាស្ថាន​ជាតិ​ ស្ថិតិ​ក្នុង​ឆ្នាំ ​២០១៧​ (NIS/EC2017) បាន​បង្ហាញ​ថា​បុគ្គល​ស្វ័យ​និយោជន៍​ទូ​ទាំង​ប្រទេស​ ដែល​រួម​ទាំង​អ្នក​លក់​ដូរ​តាម​ដង​ផ្លូវ​ផង​ដែរ​ មាន​ចំនួន​​៤៥%​ (២៣.៥%​នៅ​ភ្នំពេញ​) ស្មើ​នឹង ​៣,៩០៣,០០០​ នាក់ (២៥០,០០០​នាក់​) នៃ​ចំនួន​អ្នក​មាន​ការងារ​ធ្វើ​សរុប​ដែល​មាន​ចំនួន​ប្រហែល​ ១០ លាន​នាក់​​ ហើយ​ក្នុង​នោះ​មាន​ស្រ្តី​ជាង​ ៥០% ។ អ្នក​លក់​ដូរ​តាម​ដង​ផ្លូវ​នៅ​ប្រទេស​កម្ពុជា​ ក៏​ដូច​ជា​ប្រទេស​ដទៃ​ជា​ច្រើន​ទៀត​ ដែល​ពុំ​ទាន់​មាន​គោល​នយោបាយ​ ​ឬ​ច្បាប់​ជាក់​លាក់​ណា​មួយ​ដើម្បី​ការពារ​ផលប្រយោជន៏​ និង​ធ្វើ​ឲ្យ​ប្រសើរ​ឡើង​ដល់​លក្ខខណ្ឌ​ការងារ​របស់​អ្នក​លក់​ដូរ​តាម​ដង​ផ្លូវ​នៅ​ឡើយ​ទេ​។ ពួកគេ​បន្ត​ជួប​ប្រទះ​ការ​លំបាក​ជា​ច្រើន​ ដូចជា​ការ​គ្មាន​ស្ថេរភាព​ប្រាក់​ចំណូល​ និង​គ្មាន​ទី​តាំង​ជាក់​លាក់​សំរាប់​ប្រកប​របរ​ មាន​ការ​រើស​អើង​និង​កៀប​សង្កត់​ និង​ជួនកាល​ត្រូវ​បាន​រំខាន​ ឬ​បំពាន​ពី​ម្ចាស់​ទី​តាំង​ ពី​អាជ្ញាធរ​មូលដ្ឋាន​ក្នុង​ការ​បណ្តេញ​ចេញ​ពី​ទី​តាំង​លក់​ដូរ​ ជាពិសេស​នៅ​ពេល​ដែល​ប្រទេស​មាន​ការ​រីកចម្រើន​នូវ​ហេដ្ឋា​រចនាសម្ព័ន្ធ​ខ្ពស់​។ ស្រ្តី​ដែល​អ្នក​លក់​ដូរ​តាម​ដង​ផ្លូវ​កាន់​តែ​មាន​ការ​ប្រឈម​ខ្ពស់​ ជា​ពិសេស​សម្រាប់​អ្នក​ដែល​ មាន​កូច​តូច​ហើយ​គ្មាន​អ្នក​ថែរក្សា​។

ម៉្យាង​ទៀត​ អ្នក​លក់​ដូរ​តាម​ដង​ផ្លូវ​ភាគ​ច្រើន​មាន​ចំណេះដឹង​មាន​កម្រិត​ មិន​មាន​ស្ថេរភាព​ដល់​លក្ខខណ្ឌ​រស់នៅ​ និង​មាន​ប្រាក់​ចំណូល​ទាប​ ក្រោម​ប្ញ​​ជាប់​នឹង​ខ្សែ​បន្ទាត់​នៃ​ភាព​ក្រីក្រ​​ផង​ដែរ​។ ពួក​គេ​ងាយ​រងគ្រោះ​ចំពោះ​ស្ថានភាព​សុខភាព​ មាន​ហានីភ័យ​ចំពោះ​ស្ថានភាព​សេដ្ឋកិច្ច​និង​សង្គម​ បញ្ហា​អស្ថេរភាព​ចំណូល​ ។

“អ្នក​លក់​ដូរ​តាម​ផ្លូវ​ចូល​រួម​យ៉ាង​សកម្ម​ធ្វើ​ឲ្យ​ប្រសើរ​ឡើង​នូវ​សេដ្ឋកិច្ច​គ្រួសារ​ និង​សេដ្ឋកិច្ច​ជាតិ​ អ្នក​លក់​ដូរ​តាម​ផ្លូវ​មាន​សិទ្ធិ​ដូច​កម្មករ​ក្នុង​វិស័យ​ដទៃ​ទៀត​ដែរ​”​។ គោល​នយោបាយ​សម្រាប់​ការពារ​ផល​ប្រយាជន៏​សមស្រប​សម្រាប់​អ្នក​លក់​ដូរ​តាម​ដង​ផ្លូវ​​​ គឺ​ជា​ការ​ចាំបាច់​។ ទន្ទឹម​នឹង​នេះ​ ការ​ទទួល​បាន​នូវរ​បប​កិច្ចគាំពារ​សង្គម​ និង​សុខមាលភាព​ដែល​រួម​បញ្ចូល​ទាំង​ការ​ធានា​សុខភាព​ ការ​ថែ​ទាំ​កុមារ​ ការ​អប់រំ​ ការ​មាន​អនាម័យ​ និង​សុវតិ្ថភាព​នៅ​កន្លែង​លក់​ដូរ​ និង​ការ​ទទួល​បាន​សេវា​ហិរញ្ញវត្ថុ​ គឺ​ជា​រឿង​សំខាន់​ខ្លាំង​ណាស់​ ហើយ​ដែល​ពួក​គាត់​ត្រូវ​តែ​ទទួល​បាន​ជា​ដាច់​ខាត​។ ដើម្បី​ឆ្លើយ​តប​ទៅ​នឹង​តម្រូវការ​របស់​អ្នកលក់​ដូរ​តាម​ផ្លូវ​ឲ្យ​មាន​ប្រសិទ្ធភាព​ ជា​ការ​ចាំ​បាច់​ដែល​ទាម​ទារ​បន្ត​ឲ្យ​មាន​ ការ​ចង​ក្រង​ក្រុម​ ការ​ពង្រឹង​សមត្ថភាព​ និង​ការ​ចូលរួម​វិភាគ​ស្ថានភាព​ឲ្យ​បាន​ល្អិត​ល្អន់​អំពី​តម្រូវការ​ជាក់​លាក់​របស់​ពួកគាត់​ ហើយ​ត្រូវ​ផ្តល់​ឱកាស​ក្នុង​ការ​ចូលរួម​បង្កើត​គោល​នយោបាយ​នានា​ ដែល​ឆ្លើយ​តប​ទៅ​នឹង​តម្រូវការ​ ការ​ចូលរួម​អនុវត្ត​គម្រោង​ ការ​ចូលរួម​ធ្វើ​សេចក្តី​សម្រេច​ចិត្ត​ និង​ការដឹកនាំ​។

អង្គការ​អុកស្វាម​ មាន​កិតិ្តយស​ដោយ​បាន​និង​កំពុង​ចូលរួម​ចំណែក​យ៉ាង​សកម្ម​ជាមួយ​ដៃគូ​នានា​ និង​ស្ថាប័ន​ជាតិ​-អន្តរជាតិ​ ដើម្បី​ធ្វើ​ឲ្យ​ប្រសើរ​ឡើង​នូវ​ស្ថានភាព​សេដ្ឋកិច្ច​រឹងមាំ​ក្នុង​សង្គម​របស់​កម្មករ​និយោជិត​ដែល​ងាយ​រងគ្រោះ​ទាំងអស់​ ទាំង​ក្នុង​ និង​ក្រៅ​ប្រព័ន្ធ​ តាម​រយៈ​ការ​ផ្តល់​អនុសាសន៍​ និង​ការ​សន្ទនា​សង្គម​ជាមួយ​អ្នក​ពាក់ព័ន្ធ​នានា​ក្នុង​ការ​ធ្វើ​សេចក្តី​សម្រេច​ចិត្ត​ ដើម្បី​ពង្រីក​វិសាលភាព​ ការ​ផ្តល់​ហិរញ្ញវត្ថុ​ និង​ការផ្តល់​សេវា​គាំពារ​សង្គម​ឲ្យ​រឹត​តែ​មាន​ប្រសិទ្ធភាព​ និង​មាន​សមធម៌​។ អង្គការ​អុកស្វាម​ សូម​ធ្វើ​ការ​កោត​សរសើរ​ដល់​ សមាគម​ IDEA ​ដែល​បាន​ប្រឹង​ប្រែង​យ៉ាង​ខ្លាំង​ក្លា​ ដើម្បី​ធ្វើ​ឲ្យ​សិទ្ធិ​ សេរីភាព​ ជីវភាព​ និង​ការ​រស់​នៅ​របស់​កម្មករ​សេដ្ឋកិច្ច​ក្រៅ​ប្រព័ន្ធ​​ទាំង​អស់​ឲ្យ​រឹត​តែ​ប្រសើរ​ឡើង​។

អង្គការ​អុកស្វាម​ សូម​អបអរ​សាទរ​ដល់​រាជរដ្ឋាភិបាល​កម្ពុជា​ ដែល​បាន​ដាក់​ចេញ​ឲ្យ​ប្រើ​ប្រាស់​នូវ​ក្រប​ខ័ណ្ឌ​គោល​នយោបាយ​ជាតិ​គាំពារ​សង្គម​ បេឡា​ជាតិ​របប​សន្តិសុខ​សង្គម​ ហើយ​ជា​ពិសេស​ថ្មីៗ​នេះ​ រាជរដ្ឋាភិបាល​កំពុង​តែ​គិត​គូរ​​ក្នុង​ការ​បញ្ចូល​កម្មករ​ក្រៅប្រព័ន្ធ​ ដូច​ជា​​កម្មករ​ការងារ​ផ្ទះ​ និង​បុគ្គល​ស្វ័យ​និយោជន៍​ទៅ​ក្នុង​របប​សន្តិសុខ​សង្គម​ ដែល​ជា​ឱកាស​មួយ​ដ៏​ល្អ​ប្រសើរ ​ឆ្លើយ​តប​ទៅ​នឹង​ផល​ប្រយោជន៍​ និង​តម្រូវការ​របស់​កម្មករ​និយោជិត​ ជា​ពិសេស​ស្ត្រី​ដែល​កំពុង​ធ្វើ​ការ​ក្នុង​វិស័យ​សេដ្ឋកិច្ច​ក្នុង​ប្រព័ន្ធ​និង​ក្រៅ​ប្រព័ន្ធ​។ ក្រោម​ការ​យក​ចិត្ត​ទុក​ដាក់​នេះ​ យើង​សង្ឃឹម​យ៉ាង​មុត​មាំ​ថា​ រាជរដ្ឋាភិបាល​កម្ពុជា​នឹង​បន្ត​យក​ចិត្ត​ទុក​ដាក់​និង​ពង្រីក​វិសាលភាព​ឆ្លើយ​តប​ដល់​កម្មករ​គ្រប់​វិស័យ​រួម​ទាំង​អ្នក​ប្រកប​របរ​លក់​ដូរ​តាម​ផ្លូវ​ផង​ដែរ​។

អង្គការ​អុកស្វាម​នឹង​បន្ត​សហការ​ សំណូមពរ​ និង​លើក​ទឹកចិត្ត​ដល់​រាជរដ្ឋាភិបាល​កម្ពុជា​បន្ត​ផ្តល់​ការ​គាំទ្រ​ដល់​កម្មករ​សេដ្ឋកិច្ច​ក្រៅ​ប្រព័ន្ធ​លើ​គ្រប់​វិស័យ​ ដើម្បី​ឲ្យ​ពួកគាត់​ទទួល​បាន​នូវ​កិច្ច​គាំពារ​សង្គម​កាន់​តែ​ទូលាយ​។ ជាមួយគ្នានេះ​ផង​ដែរ​ ខ្ញុំ​សូម​សំណូមពរ​ដល់​ស្ថាប័ន​ទាំង​អស់ ​គិត​គូរ​ជា​ពិសេស​ក្នុង​ការ​បង្កើត​គម្រោង​ និង​ការ​អនុវត្ត​គម្រោង​ទាំង​អស់​ប្រកប​ដោយ​ការ​ចូលរួម​របស់​កម្មករ​សេដ្ឋកិច្ច​ក្រៅ​ប្រព័ន្ធ​ និង​ការ​ឆ្លើយ​តប​នឹង​យេនឌ័រ​ ។

ជា​ចុង​បញ្ចប់​ ខ្ញុំ​សូម​គោរព​ជូន​ពរ​ដល់​នាង​កញ្ញា​ លោក​ លោកស្រី​ និង​អ្នក​ចូល​រួម​ទាំង​អស់​ ឲ្យ​មាន​សុខភាព​ល្អ​ និង​ជោគជ័យ​ក្នុង​ការងារ​៕​